Bakı Ağır Cinayətlər məhkəməsində “Xural” qəzetinin baş redaktoru Əvəz Zeynallı ilə bağlı proses zərərçəkən hesab olunan şəxslərin ifadə verməsi ilə davam etdirilib.
Əvəz Zeynallı Səfərli barədə yazılanlarla bağlı onun da mövqeyini işıqlandırmaq üçün dəfələrlə vəkili vasitəsilə müraciət etdiyini, lakin heç bir cavab verilmədiyini bildirib. Cərimənin ödənməməsinə gəldikdə isə, bu barədə məhkəmə qərarı olsa da, ondan bu pulun tələb olunmadığını bildirib.
Növbəti zərərçəkən müğənni Nüşabə Ələsgərli 2007-ci ildə “Xural” qəzetinin hansısa əməkdaşı tərəfindən ona zəng edilərək pul tələb edildiyini, əks təqdirdə yarıçılpaq şəkillərinin qəzetdə yerləşdiriləcəyi ilə hədələndiyini dedi. O həmçinin qəzetdə bir neçə dəfə təhqir olunduğunu da bildirdi.
Əvəz Zeynallı isə məhkəmədən 2007-ci ildə ildə Nüşabə Ələsgərliyə zəng edərək onu hədələyən şəxsin kim olduğunu araşdırmaq üçün müvafiq orqanlara sorğu göndərilməsini xahiş etdi. Zeynallı həmçinin qəzetdə Nüşabə Ələsgərli ilə bağlı yazını məhkəmə zalında səsləndirərək burdakı ifadələrin ona aid edilmədiyini bildirdi.
Məhkəmənin gedişində Nüşabə Ələsgərli ilə prosesdə iştirak edən şəxslər arasında bir neçə dəqiqəlik mübahisə yarandı.
Proses 27 iyun saat 14:00-da növbəti zərərçəkənlərin ifadə verməsi ilə davam etdiriləcək.
Xatırladaq ki, YAP siyasi Şurasının üzvü, deputat Gülər Əhmədovanın şikayəti əsasında Korrupsiyaya Qarşı Mübarizə İdarəsində baş redaktor barəsində Cinayət Məcəlləsinin 311.3.3 (külli miqdarda rüşvət alma) və 311.3.4-cü (hədə-qorxu tətbiq olunmaqla rüşvət alma) maddələri ilə cinayət işi başlanıb və 2011-ci il oktyabrın 28-də Nəsimi rayon Məhkəməsi Əvəz Zeynallı barəsində 3 aylıq həbs qətimkan tədbiri seçib. 2012-ci il yanvar ayının 17-də baş redaktorun həbs müddəti üç ay uzadılıb.