Xəbər verdiyimiz kimi, mayın 1-dən 3-ə kimi Vaşinqtonda 3 May Beynəlxalq Mətbuat Azadlığı Günü ilə bağlı YUNESKO tərəfindən tədbir keçirilmişdir.
Tədbirə qatılan Reportyorların Azadlıq və Təhlükəsizlik İnstitutunun sədri Emin Hüseynovun verdiyi məlumata görə, tədbir iştirakçıları tərəfindən “21-ci əsr Mediası: yeni sərhədlər, yeni maneələr” adlı Vaşinqton Bəyannaməsi qəbul edilib. Bəyannamədə müasir dövr üçün medianın və jurnalistlərin fəaliyyətinin əhəmiyyəti vurğulanır və həm YUNESKO-ya, həm də YUNESKO-nun üzv-dövlətlərinə çağırışlar əks olunur. Üzv-dövlətlər üçün əsas çağırışlar Ümumdünya İnsan Hüquqları Bəyannaməsinin 19-cu (söz azadlığı) maddəsi ilə nəzərdə tutulan öhdəliklərə riayət etmək və ifadə azadlığı prinsiplərini İnternetə və digər yeni informasiya texnologiyalarına uyğunlaşdırmaqdan ibarətdir. YUNESKO-ya çağırış isə İnterneti və sosial şəbəkələri demokratik müzakirələr və vətəndaş iştirakçılığı üçün təbliğ etmək olub.
Hüseynov onu da əlavə edib ki, tədbirdə müxtəlif ölkələrdən 200-dən artıq şəxs iştirak edib. 2009-cu ilin iyulunda Azərbaycanda həbs edilən bloggerlər Emin Milli və Adnan Hacızadə tədbirə dəvətli olublar, lakin ölkədən buraxılmadıqlarına görə tədbirin işinə skype vasitəsilə qatılıblar.