Son günlər Azərbaycan mətbuatında yeni il qabağı gözlənilən əfv fərmanı və bu fərmanın həbsdə olan jurnalistlərə də şamil olunacağı haqda məlumatlar gedir.
Mövzu ilə bağlı RATİ həbsdə olan 4 jurnalistin ailə üzvlərinin möqeyini öyrənib.
"Azadlıq" qəzetinin baş redaktoru Qənimət Zahidin (Zahidov) həyat yoldaşı Ayəndə Mürsəliyeva gözlənilən əfv fərmanına ümid bağlamır: "Mən də, Qənimət də gözlənilən fərmana psemist yanaşırıq. Bü səbəbdən də Qənimətin azad olunası xahişi ilə heç bir ərizə ilə rəsmi orqanlara müraciət etmək fikrimiz yoxdur".
"Bizim yol" qəzetinin əməkdaşı Müşfiq Hüseynovun həyat yoldaşı Arzu Hüseynova isə gözlənilən əvf fərmanına optimist yanaşdı: "Müşfiq günahsız olduğu halda həbsdədir və bu yaxınlarda onun əfv fərmanı ilə azad olunacağına inanıram. Onun hər dəqiqə azad olunmasına ümid edirəm. Bu tək mən yox, onun iki balaca övladının da ümididir".
"Realnıy Azerbaydjan" və "Gündəlik Azərbaycan" qəzetlərinin baş redaktoru Eynulla Fətullayevin anası Gülşən Fətullayeva isə, artıq bir dəfə əfvlə bağlı müracət etdiklərini və bunun heç bir nəticəsinin olmadığını söylədi: "Əgər lazım gələrsə yenə də müraciət edə bilərik, təki övladım azadlıqda olsun".
"Azadlıq" qəzetinin əməkdaşı, satiraçı şair Mirzə Sakitin (Sakit Zahidov) həyat yoldaşı Rəna Zahidova isə əfv fərmanından heç nə gözləmədiyini və müraciət etmək fikrində olmadıqlarını bildirdi.