Noyabrın 7-də Bakı Ağır Cinayətlər məhkəməsində “Xural” qəzetinin baş redaktoru Əvəz Zeynallı ilə bağlı növbəti məhkəmə prosesi keçirilib. Prosesdə şahid qismində dindirilməli olan sabiq deputat Gülər Əhmədova bu dəfə də məhkəməyə gəlməyib.
Hakim Ramella Allahverdiyeva Əvəz Zeynallının istintaq zamanı yoxa çıxmış telefonları ilə bağlı Korrupsiyaya Qarşı Mübarizə İdarəsinə göndərilən sorğuya cavab verildiyini, həmin məktubda baş redaktorun üzərindən telefon götürülmədiyinin qeyd edildiyini bildirib.
Hakim Əvəz Zeynallıya ifadə verməyi təklif etsə də, o, Gülər Əhmədova dindirilməyincə heç bir ifadə verməyəcəyini bildirib.
Proses 14 noyabr saat 14:00-a təxirə salınıb.
Məhkəmə prosesində Human Rights Watch təşkilatının nümayəndələri də iştirak edib.
Xatırladaq ki Əvəvz Zeynallı Cinayət Məcəlləsinin 311.3.3 (külli miqdarda rüşvət alma) və 311.3.4-cü (hədə-qorxu tətbiq olunmaqla rüşvət alma) maddələri ilə ittiham edilir.