Aprelin 28-də Gəncə şəhər Nizami rayon Məhkəməsində hakim Emin Axundovun sədrliyi ilə orduda xidmətdən yayınmaqda ittiham olunan gənc fəal Bəxtiyar Hacıyevin işi üzrə təyin olunan məhkəmə prosesi keçirildi. Bu barədə RATİ-yə Bəxtiyar Hacıyevin vəkili Elçin Namazov məlumat verib.
Vəkil bildirdi ki, məhkəmə iclası müdafiə tərəfin qaldırdığı vəsatətlərlə başlayıb. Belə ki, Bəxtiyar Hacıyevin vəkilləri onun barmaqlıq arxasından çıxarılaraq, vəkilləri ilə birgə əyləşməsi, foto və video çəkiliş aparılması, cinayət işinə xitam verilməsi və ziyalılar – İntiqam Əliyev, Cəmil Həsənli, Eldar Namazov, Ənnağı Hacıbəyli və digərlərinin hakimə yazılı müraciətinə əsasən gənc fəalın zaminə buraxılması barədə vəsatət qaldırıblar.
Dövlət ittihamçısı Aliksey Abbasov isə vəsatətlərin əsassız hesab edilərək təmin edilməməsini məhkəmədən xahiş edib.
Hakim Emin Axundov müdafiə tərəfin iki vəsatətini: Bəxtiyar Hacıyevin vəkilləri ilə birgə əyləşməsi, eləcə də foto və video çəkilişin aparılması barədə vəsatəti qismən təmin edib və məhdud vaxt çərçivəsində çəkilişin aparılmasına icazə verib.
Daha sonra hərbi həkim komissiyasının sədri Eldəniz Nağıyev və Anar İsgəndərov şahid qismində dindiriliblər.
Hakim E. Axundov prosesi 5 may saat 11:00-a qədər təxirə salıb.
Xatırladaq ki, Bəxtiyar Hacıyev barəsində cinayət işi yanvarın sonlarında açılıb. Elə həmin vaxt ondan yaşadığı yeri tərk etməmək haqqında iltizamnamə alınıb, fevralın əvvəllərində isə bu qətimkan tədbiri “polisin nəzarətində olma” ilə əvəz olunub.
Martın 4-də Hacıyev bir ay müddətinə həbs edilib. Hüquq mühafizə təşkilatları hesab edirlər ki, 2010-cu il parlament seçkilərində deputatlığa namizəd olmuş gənc fəal facebook-da gənclərin 11 mart “Böyük xalq günü” etiraz aksiyasını təyin edən qrupun üzvü olduğuna görə həbs olunub.