Dünən (22 iyul) Fransada yaşayan bir qrup azərbaycanlı Azərbaycanın Fransadakı səfirliyi qarşısında Azərbaycanda söz azadlığına basqılara etiraz olaraq aksiya keçirib. Aksiyanı azərbaycanlı gənclərin iştirakı ilə “Sərhədsiz reportyorlar” beynəlxalq jurnalist təşkilatı düzənləyib. Xəbəri “Turan”a etiraz aksiyasının təşkilatçılarından biri Aqil Xəlil verib.
Təxminən 20-yə yaxın aksiya iştirakçısı səfirlik binası önündə həbsdə olan jurnalistlərin, həmçinin bloqçular Adnan Hacızadə və Emin Millinin şəkillərini qaldırıb və şüarlar səsləndirərək Azərbaycanda azad fikrə basqılara etiraz ediblər. ”Biz aksiyanın qətnaməsini səfirliyə təqdim etdik. Sənəddə həbsdə olan jurnalistlərin dərhal azadlığa buraxılması, ölkənin Avropa Şurası qarşısında götürdükləri öhdəliklərə əməl etməsi, fərqli siyasi görüşü olan insanlara qarşı təqibləri dayandırması tələb olunur” – deyən A.Xəlil vurğulayıb ki, Azərbaycanın Parisdəki baş konsulu Famil Əliyev aksiya iştirakçıları ilə görüşərək onların tələblərini dinləyib.