TƏLƏBƏ-JURNALİSTİN ALİ MƏKTƏBDƏN QOVULMASI İLƏ BAĞLI AKSİYA KEÇİRİLİB

fevral 19th, 2010
Bu gün (19 fevral) “Dalğa” Gənclər Hərəkatının bir qrup üzvü Azərbaycan Dövlət Neft Akademiyasından (ADNA) xaric edilmiş tələbə-jurnalist Elmin Bədəlovun hüquqlarının bərpası tələbi ilə dinc etiraz aksiyası keçiriblər.

Saat 15.00-da ADNA-nın əsas və ikinci tədris korpusunun qarşısında təşkil olunan aksiyada “Elmin Bədəlova haqsızlıq dursun”, “Haqsızlığı bizə çatmamış durduraq”, “Azad və güclü təhsil naminə” şüarları səsləndirilib və aksiya 1 saatadək davam edib. Aksiya iştirakçıları etiraz və tələblərini bildirmək üçün akademiya rəhbərliyi ilə görüşməyə cəhd göstərsələr də, təhsil müəssisəsinin gözətçiləri və polis nəfərləri görüş vaxtının saat 14:00-dan 15:30-dək olduğunu bildirərək, onlara içəri daxil olmağa icazə vermədilər. Qeyd edək ki, aksiya saat 15:00-da başlamışdır.  
Xatırladaq ki, Elmin Bədəlov 19 yanvar 2010-cu ildə ADNA-dan xaric olunub. O, 12 noyabr 2009-cu il tarixdə ADNA-dakı rüşvət halları və maliyyə fırıldaqları ilə bağlı pia.az saytında “Azərbaycan Dövlət Neft Akademiyasından reportaj” adlı  məqalə yazdıqdan sonra təzyiqə məruz qaldığını bildirir və imtahanlardan qərəz nəticəsində kəsildiyini iddia edir.