Dünən (6 may) Bakı Apellyasiya Məhkəməsində hakim Mədinə Bağırovanın sədrliyi ilə “Azadlıq” qəzetinin əməkdaşı Aqil Xəlilin Baş Prokurorluğun Ağır Cinayətlər üzrə İstintaq İdarəsinin müstəntiqi Əli Quluyevə , eləcə də AzTV, “Lider”, “Space” və ATV telekanallarına qarşı irəli sürdüyü iddiası təmin olunmayıb.
Bu barədə məlumatı Reportyorların Azadlıq və Təhlükəsizlik İnstitutuna ( RATİ ) Aqil Xəlilin səlahiyyətli nümayəndəsi, Media Hüquqları İnstitutunun vəkili Elçin Sadıqov verib.
E.Sadıqov bildirdi ki, iddia şərəf və ləyaqətin təhqir olunması, nüfuza xələl gətirmə, şəxsi həyata müdaxilə ilə əlaqədar olaraq irəli sürülüb və məhkəmədən dəyən mənəvi ziyana görə telekanalların və müstəntiqin təzminat ödəmələri xahiş edilib. Elçin Sadıqov həmçinin iddianın sözügedən telekanallarda Baş Prokurorluğun İstintaq qrupunun hazırladığı süjetin nümayiş olunması ilə əlaqədar olduğunu da qeyd edib. Lakin məhkəmə 28 avqust 2008-ci il tarixlində Yasamal rayon məhkəməsinin çıxardığı qərarı qüvvədə saxlayıb.
Xatırladaq ki, 07 aprel 2008-ci ildə AZTV 3 nəfər tərəfindən Aqil Xəlilin homoseksual olduğunu iddia edən veriliş yayımlayıb də bundan sonra Baş Prokurorluq tərəfindən təqdim edilən videosüjet "Space" , "Lider" və ATV telekanallarında efirə verilib. Efirə verilmiş materialları şəxsi həyatına müdaxilə, şərəf və ləyaqətin alçaldılması kimi qiymətləndirən Aqil Xəlil məhkəməyə müraciət edib.