Aprelin 4-də “Azadlıq” qəzetinin müxbiri Ramin Deko saat 21:10 radələrində redaksiyadan evə gedərkən Milli Elmlər Akademiyasının yanında tanımadığı iki nəfərin fiziki hücumuna məruz qalıb. Bu barədə bu gün (5 aprel) Reportyorların Azadlıq və Təhlükəsizlik İnstitutuna (RATİ) Ramin Deko məlumat verib.
R. Deko bildirdi ki, hücum nəticəsində müxtəlif dərəcəli bədən xəsarətləri alsa da həmin şəxslərdən qurtula bilib:
“Həmin şəxslər mənə bir daha aksiyalarda iştirak etməməyi və “ağıllı” olmağı məsləhət gördüklərini dedilər. Bundan sonra mənə müxtəlif zərbələr endirdilər” deyə jurnalist bildirdi.
R. Deko həmçinin qeyd etdi ki, aprelin 3-də mülki geyimli naməlum şəxslər onu avtomobilə oturdaraq, şəhər kənarına aparıblar və telefonunu əlindən alaraq, “Azadlıq” qəzetində deyil, “Yeni Azərbaycan”, “Xalq qəzeti” kimi qəzetlərdə işləməyin daha məqbul olacağını başa salmağa çalışıblar.
Qeyd edək ki, bir neçə gün əvvəl “Azadlıq” qəzetinin siyasi şərhçisi Seymur Həziyev də naməlum şəxslər tərəfindən oğurlanılaraq işgəncələrə məruz qoyulmuşdu.