Rəhbərliyi ANS şirkətlər qrupunda aparılan vergi yoxlamaları ilə bağlı açıqlama verib. Bu barədə bu gün (26 noyabr) Reportyorların Azadlıq və Təhlükəsizlik İnstitutuna (RATİ) şirkətin ictimai əlaqələr üzrə baş müşaviri Mais Məmmədov məlumat verib.
“Biz vergi müfəttişlərinə ANS-in şirkətlərində işləmək üçün bütün şəraiti yaratmışıq və hər şey işgüzar mühit və qarşılıqlı anlaşma şəraitində gedir. Belə olan halda, Vergilər Nazirliyinin mətbuat xidmətinin ictimai açıqlamaları şirkətin imic və işgüzar fəaliyyətinə ziyan vura bilər. ANS şirkətlər qrupu Azərbaycanın media sahəsində ən iri vergi ödəyicisidir və yarandığı vaxtdan dövlətdən heç bir dotasiya almır, özünü maliyyələşdirmə yolu ilə işləyir, qanunvericiliyinə hörmət və diqqətlə yanaşır” – deyə M. Məmmədov qeyd etdi.
Xatırladaq ki, cari ilin noyabr ayının 13-dən Vergilər Nazirliyi yanında Vergi Auditi Departamenti “ANS Kommers” və “ANS Press” şirkətlərində 2007-ci ilin oktyabrından 2010-cu ilin sentyabr ayına qədər, ANS şirkətində isə 2007-ci ilin noyabrından 2010-cu ilin oktyabrınadək olan dövrü əhatə edən səyyar vergi yoxlamasına başlayıb. Vergilər Nazirliyi (VN) yoxlamaya səbəb kimi ANS şirkətlər qrupunun vergi orqanlarına təqdim etdiyi bəyannamələrdə ziddiyyətli məlumatların müəyyən edilməsi, eləcə də VN-də vergi auditi məqsədilə tətbiq olunan risk modelləri əsasında kənarlaşma ehtimalının aşkar edilməsini göstərir.