Bu gün (4 avqust) Bakı Apellyasiya Məhkəməsində hakim Əflatun Qasımovun sədrliyi ilə Azərbaycan Milli Dövlətçilik Partiyasının sədri Nemət Pənahlı və onun dostu Ceyhun Fərzullayevin işi üzrə Nəsimi rayon Məhkəməsinin 17 iyun 2011-ci il tarixli qərarından verilən apellyasiya şikayəti üzrə ilkin məhkəmə baxışı keçirildi.
İlk olaraq, müdafiə tərəfin vəkilləri – Samir İsayev və Elçin Əliyev işin obyektiv baxışının təmin edilməsi üçün məhkəmə istintaqının keçirilməsi və Pənahlı ilə dostu haqqında olan həbs qətimkan tədbirinin dəyişdirilməsi barədə vəsatət qaldırdılar.
Qısa sürən müşavirədən sonra hakim Ə. Qasımov vəsatətlərin təmin edilmədiyini deyərək, prosesin 10 avqust saat 14:00 -a təyin edildiyini bildirdi.
Qeyd edək ki, proses zamanı Reportyorların Azadlıq və Təhlükəsizlik İnstitutunun (RATİ) əməkdaşı Rasim Əliyev polislərin fiziki təzyiqlərinə məruz qalıb və onun peşə fəaliyyətini yerinə yetirməsinə maneçilik yaradılıb.
Xatırladaq ki, yanvarın 8-də Nemət Pənahlı öz dostu Ceyhun Fərzullayev ilə birlikdə vətəndaş Eldar Rzayevin şikayəti əsasında saxlanılıb. Yanvarın 10-da Nəsimi rayon Məhkəməsi Pənahlı və Fərzullayevi Cinayət Məcəlləsinin 221.3 maddəsi ilə (silah və ya silah qismində istifadə edilən əşyaları tətbiq etməklə xuliqanlıq) iki ay müddətinə həbs edib. Münaqişəyə səbəb Pənahlının Rzayevə satdığı avtomobil olmuşdu. Yanvarın 17-də Bakı Apellyasiya Məhkəməsi bu qərarı qüvvədə saxlamışdı. 17 iyun 2011-ci ildə Nəsimi rayon məhkəməsi Nemət Pənahlının 6 il, onun tanışı Ceyhun Fərzullayev barəsində isə 4 il müddətinə azadlıqdan məhrum edilməsi barədə hökm çıxarıb.
Pənahlının doğmaları və yaxınları isə hesab edirlər ki, onun və dostunun həbsi "P.S. Nota" qəzetində və ümumiyyətlə mətbuatda hakimiyyətin ünvanına söylədiyi tənqidi fikirlərlə bağlıdır.