ELMAR HÜSEYNOVA ABİDƏNİN UCALDILMASI İLƏ BAĞLI PREZİDENTƏ MÜRACİƏT EDİLƏCƏK

Bu gün RATİ-nin ofisində Bakı Şəhər İcra Hakimiyyətinin Memarlıq və Şəhərsalma İdarəsinin RATİ-nin “Monitor” jurnalının baş redaktoru, mərhum jurnalist Elmar Hüseynova abidənin ucaldılması ilə bağlı edilən müraciətinə göndərdiyi cavab məktubu ilə əlaqədar mətbuat konfransı keçirildi.

Konfransı açıq elan edən  RATİ-nin sədri Emin Hüseynov bildirdi ki, “E.Hüseynova abidənin ucaldılması kampaniyasına biz oktyabr ayından başlamışıq. Kampaniya iki mərhələdən ibarətdir. Birinci mərhələdə imzatoplama kampaniyasını həyata keçirmək, imzaları təqdim etmək və icazə almaqdır. İkinci mərhələdə isə biz eskizləri hazırlamalı, vəsait toplamalıyıq. Bundan sonra isə heykəlin ucaldılması məsələsi öz həllini tapmalıdır. Ötən il noyabr ayının 15-də biz 560-dan artıq imza ilə BŞİH-ə müraciət etdik ki, Azərbaycanda söz azadlığı sahəsində gördüyü işlərə görə Mətbuat prospektində Elmar Hüseynova heykəl qoyulsun.  İki aydan sonra BŞİH cavab aldıq .Cavab məktubundan görünür ki, biz dövlət başçısına müraciət etməliyik. Çünki orada göstərilir ki, vətən qarşısında xüsusi xidmətləri olan vətəndaşların xatirələrini əbədiləşdirmək yalnız dövlət səviyyəsində müvafiq qərarlar qəbul edildikdən sonra BŞİH tərəfindən icra olunur. Bununla bağlı hüquqşünas, vəkil İsaxan Aşurovla müzakirələr apardıq. Və İ.Aşurov artıq bu gün Azərbaycan Respublikasının Prezidenti İlham Əliyevə müraciət hazırlayır. Müraciət qısa müddət ərzində  İlham Əliyevə göndəriləcək ki, o, da qanunla müəyyən olunmuş vaxtda öz cavabını versin”.

     RATİ-nin sədri Elmar Hüseynovun xatirəsinin əbədiləşdirilməsi istiqamətində atılacaq digər addımlar haqqında da danışıb. O qeyd edib ki, Beynəlxalq Söz Azadlığı Assosasiyası (İFEX) bu iş üçün 6000 ABŞ dolları məbləğində pul ayırıb.  Əsas məqsəd bundan ibarətdir ki, müsabiqə nəticəsində söz azadlığını ifadə edən xüsusi bir simvol hazırlansın. Bununla bağlı bir ay ərzində müsabiqənin reklam kampaniyası həyata keçiriləcək ki, hər bir vətəndaş simvol layihələrini bizə təqdim etsinlər. Bundan sonra  komissiya təşkiil ediləcək və müsabiqənin qalibləri seçiləcək. Ilk üç yeri tutmuş şəxslərə pul mükafatları təqdim olunacaq. Birinci yerə seçilmiş simvol sonradan Elmar Hüseynovun büstündə lövhəcik şəklində həkk olunacaq ki, gələcəkdə də söz azadlığının simvolu kimi bu simvoldan istifadə olunsun. Gələn həftənin əvvəlindən etibarən “Azərbaycan”, “Respublika”, “Xalq”, “Ayna”, “Zerkalo”, “Exo”, “Azadlıq” və “Yeni Müsavat” qəzetlərində reklam yerləşdiriləcək.