Dünən (14 yanvar) Bakı Apellyasiya Məhkəməsində hakim Mirzə Tağızadənin sədrliyi ilə “Azadlıq” qəzetinin baş redaktoru Qənimət Zahidin (Zahidov) məhv edilmiş əlyazmaları ilə bağlı yekun məhkəmə prosesi keçirilib.
Bu barədə RATİ-yə məlumat verən Q. Zahidin vəkili Fariz Namazovun sözlərinə görə, o, prosesdə bir neçə vəsatətlə çıxış edib. O, 1 saylı Bayıl İstintaq Təcridxanasının rəisi Misir Əliyevin və Qənimət Zahidlə bir kamerada saxlanılan məhbusların məhkəmə iclasına şahid qismində gətirilməsini tələb edib. Lakin bu vəsatətlərdən heç biri təmin olunmayıb.
Sonda isə hakim apellyasiya şikayətinin təmin edilmədiyini və Səbail rayon Məhkəməsinin qərarının qüvvədə saxlanıldığını elan edib. Vəkilin sözlərinə görə, qətnaməni 10 gün ərzində alacaqlar və Ali Məhkəməyə kassasiya şikayəti verəcəklər.
Xatırladaq ki, Q. Zahid 1 saylı Bayıl İstintaq Təcridxanasında saxlanıldığı zaman Azərbaycanın müasir tarixinə dair 300 səhifədən ibarət kitab yazmışdı. Kitabın əlyazmaları təcridxananın rəisi Misir Əliyev tərəfindən oxumaq adı ilə müəllifdən alınmışdı. Daha sonra isə M. Əliyev əlyazmalarda sabiq prezident Heydər Əliyev və hazırkı prezident İlham Əliyevin əleyhinə məlumatların əks olunduğunu əsas gətirərək kitabı məhv etdiklərini bildirmişdi.