Dünən (14 yanvar) Apellyasiya Məhkəməsində hakim Hilal Xəlilovun sədrliyi ilə ANS Şirkətlər Qrupu "Yeni Müsavat" qəzetinə qarşı qaldırdığı mülki iddia üzrə məhkəmə prosesi keçirilib.
Bu barədə RATİ-yə “Yeni Müsavat” qəzetinin əməkdaşı Elşad Paşasoy məlumat verib. E.Paşasoyun sözlərinə görə, Apellyasiya Məhkəməsi ANS-in iddiasını təmin etməyərək Binəqədi rayon Məhkəməsinin qərarını qüvvədə saxlayıb.
Qeyd edək ki, iddiaya "Yeni Müsavat" qəzetinin 13 may 2008-ci il tarixli sayında dərc olunmuş "Hərbi nazir aparat rəhbərinə qarşı" başlıqlı məqalə səbəb olub. Məqalədə qeyd olunub ki, "müdafiəmizin başındakı adamla özəl telekanal arasındakı "dadlı" əlaqələr siyasi dirəniş mərkəzinə çevrilməkdədir. Burada televiziyaya yaxın şirkətin istehsalı olan "Dadlılar" makaronu da rol oynayır. Bu makaron ordunun şəxsi heyəti, o cümlədən hərbi məktəblərin müdavimlərinin qida rasionuna daxildir". ANS bu fikirləri işgüzar nüfuzuna xələl gətirən və yalan informasiya hesab edərək Binəqədi rayon Məhkəməsində qəzetə qarşı iddia qaldırıb və dəymiş mənəvi zərərə görə “Yeni Müsavat” qəzetinin 60 min AZN məbləğində təzminat ödəməsini tələb edib. Binəqədi rayon Məhkəməsi isə bu iddianı təmin etməmişdi.