Noyabrın 28-də Bakı Apellyasiya məhkəməsində hakim İlqar Murquzovun sədrliyi ilə həbsdə olan “Bizim Yol” qəzetinin əməkdaşı, moderator.az saytının rəhbəri Pərviz Həşimlinin Milli Təhlükəsizlik Nazirliyinə qarşı iddiasına əsasən Səbail rayon məhkəməsi tərəfindən çıxarılmış qərardan verilən apellyasiya şikayətinə baxılıb. Pərviz Həşimli məhkəməyə yenə başına qara torba keçirilərək gətirilib. Proses qapalı keçirilib, jurnalistin məhkəmə binasının qarşısına toplaşan həmkarları və qohumları iclas salonuna buraxılmayıblar.
Məhkəmədən sonra vəkil Elçin Sadıqov Reportyorların Azadlıq və Təhlükəsizlik İnstitutuna(RATİ) bildirib ki, Pərviz Həşimli avtomobildən düşəndə “Demokratiya qələbə çalacaq” dediyi üçün ona zor tətbiq ediblər, sürüyə-sürüyə məhkəmə zalına aparıblar.
“Pərvizin qeydləri məcburi olaraq əlindən alınıb. Pərviz qeydləri alındığı üçün məhkəmədə çıxış etməkdən imtina edib və məhkəməni təxirə salınmasını istəyib. Mən də məhkəmədə çıxış etməkdən imtina etdim, ancaq məhkəmə bizim çıxışımız olmadan keçirildi və şikayətimiz təmin olunmadı”, -deyə Sadıqov qeyd edib.
Xatırladaq ki, Pərviz Həşimli sentyabrın 17-də Milli Təhlükəsizlik Nazirliyinin (MTN) keçirdiyi əməliyyat nəticəsində saxlanılıb. MTN-nin İstintaq Baş İdarəsi ona qarşı Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən odlu silahın və döyüş sursatının qaçaqmalçılığı) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini və döyüş sursatını əldə etmə, saxlama, daşıma) maddələri ilə cinayət işinə başlayıb. Sentyabrın 18-də Səbail rayon Məhkəməsi Pərviz Həşimli barəsində 2 aylıq həbs qətimkan tədbiri seçib. Səbail Rayon Məhkəməsi noyabrın 7-də həbs müddətinin daha 3 ay uzadılması barədə qərar verib.