Mayın 22-də 1 saylı Bayıl İstintaq Təcridxanasından Binə qəsəbəsi ərazisində yerləşən 17 saylı cəzaçəkmə müəssisəsinə köçürülən “Azadlıq” qəzetinin baş redaktoru Qənimət Zahidin (Zahidov) saxlanma şəraiti barədə nə ailə üzvlərinin, nə də vəkillərinin heç bir məlumatı yoxdur.
“Azadlıq” qəzetinin verdiyi xəbərə görə, baş redaktorun həyat yoldaşı Ayəndə Mürsəliyeva yaxın günlərdə baş redaktorla görüşəcəyini bildirib. Amma görüş üçün süni əngəllər də var:
”Görüş üçün ərizə yazıb icazə almaq lazımdır. Yəqin ki, problem yaratmazlar ”, – deyə o bildirib.
Jurnalistin vəkil Elçin Sadıqov isə bildirir ki, Zahidlə görüş üçün mütləq rəsmi icazə alınmalıdır: ”Ailəsi də, vəkilləri olaraq biz də Zahidlə birbaşa görüşə bilmərik. Bunun üçün hər dəfə müəssisənin rəhbərliyinə rəsmi qaydada ərizə ilə müraciət etmək lazımdır. Əslində, qanunvericilikdə belə bir məhdudiyyət nəzərdə tutulmayıb”, – deyə qeyd edən Sadıqov onu da əlavə etdi ki, əgər, bu istiqamətdə vəkillər və Zahidin ailə üzvləri üçün süni əngəllərin yaradılması davam edəcəksə, bu qanunsuz əməldən məhkəməyə müraciət edəcəklər.