“Azadlıq” qəzetinin bu günkü sayındakı məlumatda bildirilir ki, hakimiyyət seçki öncəsi dövrdə bəzi müxalifət qəzetlərini şirnikləndirmə taktikasından istifadə edəcək.
Mötəbər mənbəyə istinadən yazıldığı iddia edilən məlumatda bildirilir ki, yaxın günlərdə müxalifət qəzetlərindən birində çox yüksək qiymətlərdə Azərbaycanın çox məhşur və zəngin banklarından birinin silsilə reklamları yerləşdiriləcək.
Məlumata görə sözügedən banka bu tapşırıq Prezidentin İcra Aparatından verilib və bununla da hakimiyyət beynəlxalq təşkilatlara sübut etməyə çalışacaq ki, reklam bazarı müxalifət qəzetlərinin də üzünə açıqdır.
“Bu planın əsas hədəflərindən biri də odur ki, reklam pulları müqabilində həmin qəzetdə çalışan jurnalistlər insanların seçicilərə qatılmasına çağırış xarakterli yazılar yazmalıdırlar, müxalifətdaxili çəkişmələri isə qabartmalıdırlar”, – deyə məlumatda bildirilir.