Aprelin 8-də AXCP Mətbuat Xidmətinin rəhbəri və “Azadlıq” qəzetinin siyasi şərhçisi Natiq Ədilov saat 15:00-dan Səbail rayon Polis İdarəsinə çağırılıb.
Belə ki, Natiq Ədilov axşam saat 20:30-a qədər polisdə saxlanılıb və sonra sərbəst buraxılıb. Ona əsasən İctimai Palatanın 2 aprel mitinqi ilə bağlı suallar verilib.
“Saat 13:00-da telefonuma zəng gəldi və özünü Səbail Polis İdarəsinin Cinayət Axtarış Şöbəsinin rəisi Emin kimi təqdim edən şəxs məni dindirməyə dəvət etdiyini bildirdi. Deyilən vaxtda polis idarəsində oldum. Məni bir saat 40 dəqiqə gözlətdilər. Sonra Baş prokurorluğun cinayət istintaq şöbəsindən Rövşən Ağayev adlı müstəntiq gəldi və məndən şahid qismində ifadə alındı. Söhbət əsasən 2 aprel mitinqindən, onun təşkilatçılarından və bunun nə məqsədlə edilməsi barədə getdi. Məndən səsləndirdiyim “İlhama istefa!” şüarında hansı İlhamı nəzərdə tutduğumu soruşduqda, mən də hal-hazırkı prezidentimizi nəzərdə tutduğumu bildirdim. Dindirmə başa çatdıqdan sonra da məni əsassız olaraq iki saat gözlətdilər, sonra da sərbəst buraxdılar”, – deyə Azadlıq qəzetinin siyasi icmalçısı bildirdi.