Aprelin 8-də Reportyorların Azadlıq və Təhlükəsizlik İnstitutunun əməkdaşı Fərqanə Novruzova, habelə RATİ və “Turan” İnformasiya Agentliyinin əməkdaşı Rasim Əliyev Səbail rayon Polis İdarəsinin qabağında çəkiliş apararkən polislərin təzyiqinə məruz qalıblar. Qeyd edək ki, jurnalistlər “Azadlıq” qəzetinin siyasi şərhçisi Natiq Ədilovun polisə çağırılmağı ilə bağlı ərazidə çəkiliş aparırdılar.
Belə ki, iki nəfər polis əməkdaşı jurnalistlərə yaxınlaşaraq onları Polis İdarəsinə aparıb. Polis İdarəsində isə özünü sadəcə rəis kimi təqdim edən 38-40 yaşlarında mülki geyimli kişi jurnalistlərə bildirib ki, Polis İdarəsi binanın qarşısında foto və video çəkilişin yolverilməzdir və bunun üçün mətbuat xidmətinə müraciət etmək lazımdır. Hər iki jurnalist onlara məxsus jurnalist vəsiqəsinin surəti çıxarıldıqdan sonra sərbəst buraxılıb. Bundan sonra da polislər Polis İdarəsinin qarşısında gözləyən digər mətbuat nümayəndələrini – “Azadlıq” qəzetinin əməkdaşı Elmin Həsənli, “Yeni Müsavat” qəzetinin əməkdaşı Samir Kazımlı və digər jurnalistlər də polislər tərəfindən itələməklə ərazidən uzaqlaşdırıblar.