“Azadlıq” qəzeti bir neçə iddia üzrə çıxarılmış 65 min manat cərimənin hissə-hissə ödənilməsi üçün Yasamal Rayon Məhkəməsinə müraciət edib. Bu barədə bu gün (25 noyabr) Reportyorların Azadlıq və Təhlükəsizlik İnstitutuna (RATİ) qəzetin baş redaktorunun 1-ci müavini Rahim Hacıyev məlumat verib.
“Qəzet maddi çətinliklər çəkir. Biz 65 min manatı birdəfəlik ödəmək iqtidarında deyilik. Azərbaycan Respublikasının qanunları icazə verir ki, məhkəmə bu cərimənin hissə-hissə ödənilməsi barədə qərar çıxara bilər. Qəzet hələ də ağır vəziyyətdədir. Nəşriyyat qeyri-rəsmi olaraq bu həftə müəyyən məbləğin ödənilməsini istəyir. Bildiyiniz kimi biz yardım marafonundan toplanan 14 min manatı nəşriyyata ödədik. Ancaq hələ nəşriyyata 12 min manat da ödəməliyik”, -deyə Hacıyev qeyd edib.
R. Hacıyev qeyd edib ki, mətbuatın bütün problemləri siyasi iradə ilə bağlıdır və təəssüflər olsun ki, vəziyyətin düzəldilməsi üçün hər hansı addım atılmır.
Xatırladaq ki, “Azadlıq” qəzeti Bakı metrosunun rəisi Tağı Əhmədovun və iş adamı Kəbirə Məmmədovanın iddiaları üzrə 65 min manat məhkəmə cəriməsi ödəməlidir. “Qasid” firması qəzetə olan borcunu ödəmir. Qəzetin isə “Azərbaycan” nəşriyyatına 12 min manat borcu var. Qəzetin bank hesabları bağlanıb və satış nöqtələrindən gələn vəsait bütünlüklə cərimələrin ödənməsinə yönəldilir.