“Azadlıq” qəzetinin Gəncəbasar bölgə müxbiri Ərşad İbrahimli naməlum şəxs tərəfindən izlənməsi barədə Reportyorların Azadlıq və Təhlükəsizlik İnstitutuna (RATİ) məlumat verib. Onun sözlərinə görə, yanvarın 22-də Gəncə şəhər polisindən olduğunu deyən, amma adını gizli saxlayan bir nəfər onunla telefon əlaqəsi saxlayaraq, onun nəzarətə götürülməsi barədə xəbərdar edib.“Yanvarın 23-də səhər saatlarında isə mülki geyimdə olan bir nəfərin məni izlədiyini hiss etdim”- deyən İbarahimli əlavə edib ki, izlənmənin jurnalist fəaliyyəti ilə bağlı olduğunu düşünür. “Gəncədə keçmiş polis rəisi Rasim Musayevlə icra başçısı Elmar Vəliyevin davası haqda məlumatların mətbuata çıxmasında məndən şübhələnə bilərlər və izləmə də bununla bağlı ola bilər” – deyə jurnalist bildirib.