Azərbaycan hökuməti Avropa Şurası Parlament Assambleyasının (AŞPA) yay sessiyasında müzakirəyə çıxarılacaq “Azərbaycanda demokratik institutların fəaliyyəti haqqında” qətnamə layihəsini diqqətlə öyrənib.
Bunu APA-ya Azərbaycan Milli Məclisinin AŞPA-dakı nümayəndə heyətinin rəhbəri Səməd Seyidov bildirib.
Onun sözlərinə görə, qətnamənin müzakirəsi sessiyanın ikinci günü – iyunun 24-də aparılacaq, sessiyanın ilk günü – iyunun 23-də isə qətnamə layihəsinin son variantı qurumun Monitorinq Komitəsində (MK) müzakirə olunacaq.
“Bizim bu sənədə bəzi əlavələrimiz və dəyişikliklərimiz var”, – deyə qeyd edən deputat qətnamənin müzakirəsi zamanı nümayəndə heyətinin sənədə münasibət bildirəcəyini söyləyib.
Belə ki, Monitorinq Komitəsinin mayın 26-da Kiyevdə keçirilmiş iclasında “Azərbaycanda demokratik institutların vəziyyəti” adlı qətnamə layihəsi hazırlanıb. APA-nın məlumatına görə, layihədə bildirilir ki, Azərbaycanda insan haqları ilə bağlı vəziyyət seçkilər öncəsi pisləşib. Habelə sənəddə həbsdə olan jurnalistlər və siyasi məhbus hesab olunan digər şəxslərin azadlığa buraxılması tələb olunur.