OMBUDSMAN NAXÇIVANDAKI POLİS ZORAKILIĞINA GÖRƏ MUXTAR RESPUBLİKA DİN-Ə MÜRACİƏT EDİB

     RATİ-nin əməkdaşı Rəsul Cəfərovun təkrar müraciəti əsasında Azərbaycan Respublikasının İnsan Hüquqları üzrə Müvəkkili (Ombudsman) Elmira Süleymanova Naxçıvan Muxtar Respublika Daxili işlər naziri Əhməd Əhmədova müraciət ünvanlayıb. 

Qeyd edək ki, Cəfərov ötən ilin sonunda polis zorakılığına məruz qalmış Çapay Əlisoy və onun ailə üzvlərinə Şərur rayon Püsyan kəndində baş çəkmiş və hadisə ilə bağlı Ombudsmana müraciət etmişdi. Ombudsman Aparatından bu müraciətə daxil olan cavabda isə MR Daxili İşlər Nazirliyinin məlumatına istinadən qeyd edilirdi ki, Çapay  Əlisoy qeyri-qanuni ticarətlə məşğul olmuş, bununla bağlı xəbərdarlıqlara məhəl qoymamış və bu qeyri-qanuni hərəkətin qarşısını almaq məqsədilə əraziyə polis nəfərləri cəlb edilmişdi.

Cəfərov isə 6 yanvar 2011-ci ildə yenidən Ombudsmana müraciət edərək, Əlisoyun qeyri-qanuni ticarətlə məşğul olma barədə iddiaların əsassız olduğunu bildirmiş və Əlisoyun ticarətlə məşğul olmasına görə vergi ödəyicisi kimi uçota alındığını təsdiq edən şəhadətnamənin surətini müraciətə əlavə etmişdir. Ombudsman öz növbəsində “Azərbaycan Respublikası İnsan Hüquqları üzrə Müvəkkili (Ombudsman) haqqında” Qanunun 12.2.5-ci maddəsinə əsasən bu məsələnin araşdırılması və məlumat verilməsi üçün Naxçıvan Daxili İşlər nazirinə müraciət edib.

 

* “Azərbaycan Respublikası İnsan Hüquqları üzrə Müvəkkili (Ombudsman) haqqında” Qanunun 12.2.5-ci maddəsi ilə Ombudsmanın aşağıdakı hüququ nəzərdə tutulmuşdur:

“Şikayətdə əks etdirilmiş halların yoxlanılması üçün müvafiq orqanlara tapşırıq vermək (yoxlama, qərarından və ya hərəkətindən (hərəkətsizliyindən) şikayət edilən orqana və ya vəzifəli şəxsə tapşırıla bilməz).