Bu gün (17 yanvar) Bakı Apellyasiya Məhkəməsində hakim Vaqif Mursaqulovun sədrliyi ilə Nəsimi rayon Məhkəməsinin 10 yanvar 2011-ci il tarixdə Milli Dövlətçilik Partiyasının sədri Nemət Pənahlı və onun tanışı Ceyhun Fərzəliyev barəsində 2 ay müddətinə həbs-qətimkan tədbiri seçilməsi üzrə verilən apellyasiya şikayətinə baxılıb.
Bakı Apellyasiya Məhkəməsinin nəzarət- buraxılış məntəqəsindən Reportyorların Azadlıq və Təhlükəsizlik İnstitutuna (RATİ) prosesin qapalı keçirilməsi səbəbindən media nümayəndələrinin buraxılmayacağı bildirilib.
Prosesdən sonra N. Pənahlının vəkili RATİ-yə hakim .Mursaqulovun apellyasiya şikayətini təmin etmədiyini və birinci instansiya məhkəməsinin qərarı qüvvədə saxladığını bildirdi.
Xatırladaq ki, Azərbaycan Milli Dövlətçilik Partiyasının sədri Nemət Pənahlı yanvarın 8-də mülki geyimli şəxslər tərəfindən saxlanılaraq Nəsimi Rayon Polis İdarəsi (RPİ) 21-ci polis bölməsinə aparılıb. Pənahlının saxlanmasına səbəb yanvarın 7-də vətəndaş Eldar Rzayevin polisə müraciəti olub. O, Mirəli Qaşqay küçəsində Pənahlı və onun tanışı Ceyhun Fərzullayev tərəfindən yumruq və metal əşya vasitəsilə döyüldüyünü iddia edərək, polisə müraciət edib. Hər iki şəxs barəsində Cinayət Məcəlləsinin (CM) 221.3-cü (silah və silah qismində istifadə edilən əşyalar tətbiq etməklə xuliqanlıq etmə) maddəsi ilə cinayət işi başlanıb.
Yaxınlarının verdiyi məlumata görə, əslində Pənahlı namizəd kimi iştirak etdiyi 7 noyabr 2010-cu il parlament seçkiləri zamanı, seçkilərdən sonra mətbuatda, xüsusilə də “Nota PS” qəzetlərində dərc olunan sərt fikirlərinə görə şərlənərək həbs edilib.