Müstəqil şəkildə fəaliyyət göstərən jurnalist Məğrub Bədəlsoy RATİ-yə bildirib ki, o dekabrın 10-da Daxili İşlər nazirinin qəbuluna yazılıb.
“Bu gün (15 dekabr) isə qəbula düşmək üçün qəbul otağına getdim. Nazirin məni qəbul etməsinə az qalmış baş istintaq və təhqiqat idarəsinin əməkdaşları qəbul otağına gəlib məni zorla otaqdan çıxardılar. Həmin idarənin rəis müavini Habil Əlişanov isə polis çağırıb, məni həbs etməyə göstəriş verdi. Təbii ki, mən getməyəcəyimi bildirdim. Bundan sonra mənə fiziki təzyiq göstərərək, polis maşınına mindirib, yaxınlıqdakı 9-cu polis bölməsinə apardılar. Mənə ən çox təsir edən oğlum yaşında olan gənc polislərin mənim ünvanıma söylədikləri təhqirləri oldu. Bölmədə 3 saatdan artıq saxlanıldıqdan sonra sərbəst buraxıldım. Məni zorla qəbul otağından çıxaranda mən var gücümlə “Ramil Usubov məni qəbul et!”-deyə qışqırdım. Və nazirliyin qarşısında da bu hərəkəti bir neçə dəfə təkrar etdim”.