Dünən “Bizim yol” qəzetinin əməkdaşı Natiq Ədilov (050) 224 -03-15 nömrəli telefondan zəng edən naməlum şəxs tərəfindən ölümlə hədələnib.
Jurnalistin RATİ-yə verdiyi məlumata görə, o 12 aprel 2008-ci il tarixdə Azərbaycan Respublikası Kənd Təsərrüfatı Nazirliyi yanında Azərbaycan Kənd İnvestisiya Layihəsinin (AzKİL) rəhbərliyinə sorğu göndərib. Sorğuda Sabirabad rayonunun Xəlfəli kəndində həyata keçirilən yol çəkilişinin maliyyələşməsi ilə əlaqədar suallar verilib.
Zəng edən şəxs sorğunun Xələfli kəndindən gələn şikayət məktubu əsasında göndərildiyini zənn edərək, jurnalistdən həmin məktubu tələb edib. Ədilov isə cavabında bildirib ki, “sorğunu araşdırma aparmaq məqsədilə göndərmişəm, əgər siz həmin təşkilatı təmsil edirsinizsə, sorğunu cavablandırmalısınız”. Zəng vuran şəxs sorğunu cavablandırmayaçağını bildirib və jurnalistin “bu haqda yazılı cavab göndərin” çağırışına belə cavab verib: “Sən bilirsən ki, buna görə gəlib sənin başını kəsərlər?” Ədilov zəng vuran şəxsin kimliyini soruşsa da, həmin şəxs “darıxma, tezliklə bilərsən kiməm” cavabını verib.