Mayın 6-da Bakı Apellyasiya Məhkəməsində hakim Camal Ramazanovun sədrliyi ilə “Bizim Yol” qəzetinin əməkdaşı Ramid İbrahimovun Nəsimi rayon Məhkəməsinin qərarından verdiyi apellyasiya şikayəti təmin edilməyib.
Prosesdən sonra Ramid İbrahimov RATİ-yə bildirdi ki, məhkəmə prosesində özü və Nəsimi rayon Polis İdarəsinin 21-ci polis bölməsinin baş təhqiqatçısı, polis kapitanı Yaşar İsayev iştirak edib. Jurnalistin sözlərinə görə, hakimin müşavirəyə getməsi 2-3 dəqiqə çəkməyib və qərarı qısa müddətə elan edilib.
Qeyd edək ki, məhkəmənin nəzarət buraxılış məntəqəsindən prosesi yaxından müşahidə etmək istəyən media nümayəndələrinə naməlum səbəbdən içəri daxil olmağa icazə verilməyib və həmçinin bunun səbəbi də izah edilməyib.
Xatırladaq ki, “Bizim Yol” qəzetinin əməkdaşı Ramid İbrahimov 26 noyabr 2010-cu ildə “Qış parkı” layihəsi əsasında Bakı şəhəri, Əlimərdan bəy Topçubaşov küçəsi 73 ünvanında evlərin sökülməsi ilə əlaqədar foto çəkiliş apararkən, Bakı Şəhər İcra Hakimiyyəti əməkdaşı tərəfindən fiziki təzyiqə məruz qalıb.