“Yeni Müsavat” qəzetinin bu günkü (21 iyun) sayında gedən məlumata görə “Lider” telekanalının Xəbərlər Departamentinin rəhbəri Vəli Əkbər iyunun 14-dən işdən çıxarılıb.
Bu məlumatı V. Əkbərin özü qəzetin əməkdaşı ilə söhbəti zamanı təsdiqləyib. V. Əkbər buraxdığı nöqsana görə, işdən çıxarılıb və onun özü həqiqətən də nöqsan buraxdığını etiraf edib. Belə ki, hazırda “Lider”də onun vəzifəsinə Tofiq Abbasov təyin olunub. Qəzetin məlumatına görə, T. Abbasov vaxtı ilə Azərbaycan Liberal Partiyasinin sədri Lalə Şövkətin köməkçisi olub.
Qeyd edək “Yeni Müsavat” qəzeti bir həftə öncə “Lider” telekanalının rəhbərliyində dəyişiklik edilməsi barədə xəbər vermişdi. Həmin xəbərdə telekanalın Xəbərlər Departamentinin rəhbəri, telekanalın faktiki ikinci adamı sayılan Vəli Əkbərin, “Səda” və “Sədadan sonra” verilişlərinin baş redaktoru Vüqar Bektaşi və siyasi verilişlərin prodüseri Gülşən Əliyevanın tutduqları vəzifədən azad edildiyi haqqında məlumat verilmişdir. Lakin V. Əkbər həmin zaman bu məlumatı təkzib etmişdi.