Azərbaycanda fəaliyyət göstərən jurnalist və hüquqşünaslardan ibarət 10 nəfərlik qrup İcma Əlaqələri Proqramının təşkil etdiyi “Medianın müdafiəsi və alternativ medianın inkişafı” mübadilə proqramında iştirak etmişlər.
Proqram ABŞ-ın Kolambus şəhərində (Ohayo ştatı) keçirilmişdir. İştirakçılar 3 həftə ərzində qəzet reaksiyalarında, telekanallarda, hüquq-mühafizə orqanlarında, məhkəmələrdə və digər qurumlarda müxtəlif görüşlər keçirmişlər. Görüşlər zamanı jurnalistlərin müdafiəsi, onların mənbələrə çıxışı, qanunvericilik, alternativ medianın və onlayn jurnalistikanın inkişafı istiqamətində ABŞ təcrübəsi barədə iştirakçılara məlumat verilmiş, iştirakçılar da öz növbəsində yuxarıda qeyd edilən məsələlərlə bağlı Azərbaycanda olan mövcud vəziyyət barədə fikirlərini bildirmişlər. Proqram iştirakçıları Azərbaycanın ABŞ-dakı səfirliyində də olmuş və burada da Azərbaycanda medianın vəziyyəti və bu vəziyyətin ölkənin beynəlxalq imicinə təsiri ilə bağlı müzakirələr aparmışlar. Proqramda RATİ-nin əməkdaşı Rəsul Cəfərov da iştirak etmişdir.