Reportyorların Azadlıq və Təhlükəsizlik İnstitutunun (RATİ) sədri Emin Hüseynovun səhhəti kafi olaraq qalır.
Onda hələ də baş ağrıları var, müalicəsi davam etdirilir. Bu barədə məlumatı E. Hüseynov özü verib. Hüseynovun sözlərinə görə bu gün Daxili İşlər Nazirliyi Daxili Tədqiqatlar İdarəsinin əməkdaşı Əzimov Fərhad Mərkəzləşdirilmiş Təcili Yardım Xəstəxanasında döyülməsi ilə əlaqədar ondan və hadisə yerində olan RATİ-nin digər əməkdaşları – Rasim Əliyev və Mirrəhim Həsənovdan yazılı izahat alıb.
Dünən Emin Hüseynov gün ərzində bir sıra müalicə prosedurlarından keçdiyindən, buna görə də yorğun olduğundan və izahatı şəxsən yaza bilmədiyindən Əzimov izahatın bu gün yazılmasını məqsədəuyğun hesab etmişdi.
Qeyd edək ki, bu gün Azərbaycan Demokratik Partiyasının sədri Sərdar Cəlaloğlu və partiyanın digər nümayəndələri Hüseynova baş çəkib.