Aprelin 7-də futbol üzrə Azərbaycan çempionatının I divizionunda mübarizə aparan “Bakılı” klubunun prezidenti Misir Əbilov “Futbol+” qəzetinin redaksiyasına basqın edib. Bu barədə “Qafqazinfo” saytına Futbol365.az saytına qəzetin baş direktoru Cəsur Məmmədov məlumat verib.
Onun sözlərinə görə, Əbilov klubun inzibatçısı Babək Mahmudovla redaksiyaya gələrək qəzetin əməkdaşlarını küçə söyüşləri ilə təhqir edib.
C.Məmmədov deyib ki, klub prezidentini hiddətləndirən qəzetdə onun dediyi fikirlərin olduğu kimi çap olunmasıdır: “Misir Əbilov müxbirimizlə söhbətində “Foqts Almaniyada bir milyon dollardan çox pulun başına daş salıb” deyib. Onun bu fikirləri də qəzetimizin bugünkü nömrəsində çap oluub. “Bakılı”nın prezidenti deyir ki, bu sözləri elə-belə deyibmiş, yazmaq üçün yox. Misir Əbilov redaksiyada o qədər səs-küy salıb küçə söyüşləri söydü ki, axırda məcbur olub polisə zəng etdik. Polis hadisə yerinə gələnə qədər onlar redaksiyadan getmişdilər”.