BƏXTİYAR HACIYEVİN İŞİ ÜZRƏ MƏHKƏMƏ HAZIRLIQ İCLASI BAŞLANIB

aprel 7th, 2011
Aprelin 7-də Gəncə şəhəri Nizami rayon məhkəməsində hakim Emin Axundovun sədrliyi ilə orduda xidmətdən yayınmaqda ittiham olunan gənc fəal Bəxtiyar Hacıyevin işi üzrə hazırlıq iclası keçirilib.

 Bu barədə “Turan”a gənc fəalın qardaşı Vüqar Hacıyev bildirib.

Onun sözlərinə görə,  gənc fəal Bəxtiyar Hacıyevin vəkilləri vəsatət qaldıraraq onun ictimaiyyət üçün təhlükəli cinayət törətmədiyi üçün dəmir barmaqlıqlar arasından çıxarılıb vəkillərlə bir  yerdə oturulmasını  məhkəmədən xahiş ediblər. Hakim bu vəsatəti təmin edib.  Daha sonra vəkillər Bəxtiyar Hacıyevin cinayət  işinə  xitam verilməsi barədə vəsatət qaldırıb.
  Bununla belə  vəkil Konstitusiyaya Məhkəməsinə sorğu göndərilərək konstitusiyada təsbit olunan alternativ xidmət haqqında müddəasının mahiyyəti barədə məlumat istəyib.
Məhkəmə bu vəsatətlər baxılmamış saxlayıb.
Hazırlıq iclası sabah davam edəcək.
Xatırladaq ki, Hacıyev barəsində cinayət işi yanvarın sonlarında açılıb. Elə həmin vaxt ondan yaşadığı yeri tərk etməmək haqqında iltizamnamə alınıb, fevralın əvvəllərində isə bu qətimkan tədbiri “polisin nəzarətində olma” ilə əvəz olunub.
Martın 4-də Hacıyev bir ay müddətinə həbs edilib.  Hüquq mühafizə təşkilatları hesab edirlər ki,  2010-cu il parlament seçkilərində deputatlığa namizəd olmuş gənc fəal  facebook-da gənclərin 11 mart “Böyük xalq günü” etiraz aksiyasını təyin edən qrupun üzvü olduğuna görə həbs olunub.