2011-ci ilin noyabrında qətlə yetirilmiş yazıçı-publisist Rafiq Tağının işi üzrə istintaqın dayandırılması qərarından şikayət verilib. Bu barədə bu gün (6 mart) Reportyorların Azadlıq və Təhlükəsizlik İnstitutuna (RATİ) jurnalistin vəkili Elçin Sadıqov məlumat verib.
“İstintaqın dayandırılması qərarından martın 6-da Nəsimi Rayon Məhkəməsinə şikayət vermişik. Biz hesab edirik ki, Rafiq Tağının işi üzrə istintaqın dayandırılması barədə qərar əsassızdır”,-deyə vəkil qeyd edib.
Xatırladaq ki, Rafiq Tağı 2011-ci il noyabrın 19-da evinə gedərkən bıçaqlanıb və 4 gün sonra noyabrın 23-də aldığı xəsarətlərdən xəstəxanada vəfat edib. İstintaqı aparan Baş Prokurorluğun Ağır Cinayətlərə Dair İşlər üzrə İstintaq İdarəsi 2014-cü il yanvarın 8-də jurnalistin cinayət işi üzrə icraatın dayandırılması barədə qərar verib.