“Bizim Yol” qəzetinin əməkdaşı Müşviq Hüseynov barəsində seçilmiş həbs qət-imkan tədbiri haqqında qərardan Avropa İnsan Haqları Məhkəməsinə şikayət göndərilib.
Bu məlumatı RATİ-yə vəkil İsaxan Aşurov verib.
Xatırladaq ki, 2007-ci il iyul ayının 26-da Nəsimi rayon məhkəməsinin hakimi Gülnarə Tağızadə tərəfindən Müşviq Hüseynov barəsində 3 ay müddətinə həbs qət-imkan tədbiri seçilmişdir. 3 avqust 2007-ci il tarixində Bakı Apellyasiya Məhkəməsinin hakimi Rəhman Mirzəyev qərarı qüvvədə saxlayıb.
Həbs qət-imkan tədbirinin müddəti bitdikdən sonra, 19 oktyabr 2007-ci il tarixində Nəsimi rayon məhkəməsinin hakimi Aygün Abdullayeva M.Hüseynov barəsində yenidən 3 ay müddətinə həbs qət-imkan qərarı çıxardıb. Bu qərar da 31 oktyabr 2007-ci il tarixində Bakı Apellyasiya Məhkəməsinin hakimi Abid Abdinbəyov tərəfindən qüvvədə saxlanılıb.