Qeyd edək ki, bir neçə gündür gənc fəalın ailəsi onunla görüşə bilmir. C. Savalanlının anası Təravət Əliyeva RATİ-yə bildirib ki, martın 31-də oğlu ilə görüşmək üçün saatlarla gözləsə də buna nail ola bilməyib.
“Mən kömək üçün “Yüksəliş naminə” qəzetinin əməkdaşı Elçin Həsənova müraciət elədim. O da aidiyyatı qurumla əlaqə saxlayıb görüşün nə zaman baş tutacağını öyrənmək istəyəndə müstəntiqin sərt münasibəti ilə qarşılaşdı” -deyə Təravət Əliyeva bildirib.
Elçin Həsənov RATİ-yə məlumatı təsdiq edərək bildirdi ki, müstəntiq onu çox kobud ifadələrlə təhqir edib.
“Təravət xanıma kömək məqsədilə müstəntiq Ziyadxan Əliyevlə əlaqə saxladım. O da məni təhqir edərək, onların işinə problem yaratmamağımı söylədi”- deyə Həsənov qeyd edib.
Xatırladaq ki, Cabbar Savalanlı fevralın 5-də qanunsuz narkotik saxlamaq ittihamı ilə həbs edilib. Cabbar Savalanlıya Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) cinayət işi açılıb. Lakin onun sosial şəbəkələrdə iqtidar əleyhinə səsləndirdiyi fikirlərə görə həbs olunmağı istisna edilmir.