“Gəncədə “Hürriyyət” qəzetinin satışına süni maneələr törədilir”. Bu barədə “Hürriyyət” qəzetinin 03 may tarixli sayında məlumat verilir.
Xəbərə görə, məşhur idmançı, Azərbaycan Taekvando Federasiyasının birinci vitse-prezidenti Fizuli Musayevin Qədir adlı bacısı oğlu Gəncədə qəzet satışı ilə məşğul olan yayım firmalarının əməkdaşlarına özünün MTN əməkdaşı olduğunu bildirərək hər gün qəzetin bütün nüsxələrini satışdan yığır. Cəmi 20 qəzetin pulunu verən Qədir qəzet satanlara bildirir ki, Gəncəyə 20-dən artıq qəzetin gətirilməsinə qadağa qoyub. Qəzetin yazdığına görə, hətta köşklərindən də “Hürriyyət” qəzeti yığılır.
Mövzu ilə bağlı Reportyorların Azadlıq və Təhlükəsizlik İnstitutunun (RATİ) apardığı araşdırmalar isə qəzetin yazdıqlarını təsdiqləmədi. Gəncə şəhər sakini İmamverdi Vəliyevin RATİ-yə verdiyi məlumata görə, “Hürriyyət” qəzeti bu gün (03 may) satışda olub.
“Qaya” mətbuat yayımının direktoru Xanhüseyn Əliyev də RATİ-nin əməkdaşı ilə söhbətində Gəncədə “Hürriyyət” qəzetinin satışı ilə bağlı heç bir problemin olmadığını bildirdi.