Martın 8-dən etibarən Avropa Şurası Nazirlər Komitəsinin İnsan Hüquqları ilə bağlı iclası başlayıb. İclas martın 11-ə kimi davam edəcək. Avropa Şurası Nazirlər Komitəsinin iclasının sonunda “Realnıy Azerbaydjan” və “Gündəlik Azərbaycan” qəzetlərinin baş redaktoru Eynulla Fətullayev barəsində qərar qəbul olunacaq. Bu barədə bu gün (10 mart) Reportyorların Azadlıq və Təhlükəsizlik İnstitutuna (RATİ)Media Hüququ İnstitutunun direktoru Rəşid Hacılı məlumat verib.
“Biz orada olarkən 30-a yaxın dövlətin nümayəndələri ilə görüşmüşük. Bundan başqa Avropa Məhkəməsinin qərarlarının icrasına nəzarət edən orqanın nümayəndələri ilə görüşmüşük. Eyni zamanda Tomas Hammerberqin ofisinin nümayəndələri ilə görüşmüşük. Eynulla Fətullayev barəsində Ali Məhkəmənin sonuncu və yanvar ayının 25-də Apellyasiya Məhkəməsinin verdiyi qərarları onlara təqdim etdik. Bu qərarlar onlarda yox idi. Onu da qeyd edim ki, Qərb dövlətləri əvvəlkindən də çox Eynulla Fətullayevin məsələsinə diqqət edirlər. Avropa Şurası Nazirlər Komitəsində də qəbul edilən qərarlar kifayət qədər həll olunur. Azərbaycan hökumətinin özünə bəraətverici arqumentləri yox idi. Biz hökumət nümayəndələri ilə görüşmək istəsək də, onlar bu görüşdən imtina etdilər. Eynulla Fətullayevin işinin iclasın hansı günündə gündəliyə salınacağını bilmirəm, amma bilirəm ki, 5 gün ərzində qərar qəbul olunacaq”, – deyə Rəşid Hacılı qeyd etdi.