“Eynulla Fətullayevin həmin müəssisəyə göndərilməməyi ilə bağlı müraciətlərinə baxmayaraq Pentensiar Xidmət Eynulla Fətullayevi məhz 1 saylı cəzaçəkmə müəssisəsinə köçürüb və bu da biz vəkilləri çox qorxudur. Biz onun həyatından narahatıq. Eynulla öz istəyi ilə çox ağır bir şəraitdə, yəni karserdə saxlanılır. Eynulla Fətullayevi 1 saylı cəzaçəkmə müəssisəsinə köçürən Pentensiar Xidmət istənilən vaxt Eynullanı karserdən çıxardıb, onun həyatı üçün real təhlükə törədə biləcək məhkumların yanına göndərə bilər. Pentensiar Xidmət nə üçün Eynulla Fətullayevi 9 saylı cəzaçəkmə müəssisinə köçürmə səbəbləri barədə məlumat vermir?”, -deyə Rəşid Hacılı qeyd edib.
Hacılı onu da əlavə etdi ki, Eynulla Fətullayev həyatının təhlükəsizliyini təmin etmək üçün karserdə saxlanılmasını istəyib, lakin karserdə saxlanılması Eynullanın həm də sağlamlığı üçün təhlükəlidir.
Xatırladaq ki, Fətullayevə qarşı 2009-cu ilin dekabrın 29-da saxlanıldığı 12 saylı Cəzaçəkmə Müəssisəsində saxta narkotik ittihamı ilə cinayət işi başlanmışdı və 06 iyul 2010-cu il tarixində Eynulla Fətullayev Cinayət Məcəlləsinin 234.1-ci maddəsi ilə (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) təqsirli bilinərək, 2 il 6 ay müddətinə azadlıqdan məhrum edilib və hökmün icrası elan edildiyi gündən hesablanır. Bu hökm 29 dekabr 2009-cu ildə 12 saylı Cəzaçəkmə Müəssisəsində Fətullayevin üzərindən 0,223 qram heroin tapılması ilə bağlı irəli sürülmüş ittiham üzrə çıxarılıb. İş üzrə verilmiş apellyasiya şikayəti təmin olunmayıb.
Habelə Eynulla Fətullayev 2007-ci ildə terrorla hədələmə və digər ittihamlarla 8 il 6 ay müddətinə azadlıqdan məhrumetmə cəzasına məhkum edilib. Lakin Avropa İnsan Hüquqları Məhkəməsi isə 2010-cu il aprelin 22-də yuxarıda qeyd edilən cinayət işləri ilə bağlı qərar qəbul etmişdi. Qərarda bildirilir ki, jurnalist dərhal azadlığa buraxılmalı və Azərbaycan dövləti ona 27 min 822 avro məbləğində təzminat ödəməlidir. Ali Məhkəmənin Plenumu isə bu qərarı qismən təmin edib.