Bu gün (26 iyul) Qaradağ rayon məhkəməsində hakim Rufan Mürsəlovun sədrliyi ilə gənc bloqçu Adnan Hacızadənin vaxtından əvvəl həbsdən azad edilməsi ilə bağlı iddiası üzrə məhkəmə prosesi keçirilib. Prosesdə 14 saylı cəzaçəkmə müəssisəsinin nümayəndələri Natiq Hacıyev və Əli Nəbiyev, həmçinin Adnan Hacızadə və vəkili İsaxan Aşurov iştirak edib.
Cəzaçəkmə müəssisəsinin nümayəndələri Adnan Hacızadənin ziddiyyətli xarakterə malik olmasını və vəkili ilə tez-tez görüşdüyünü əsas gətirərək, onun vatından əvvəl azad olunmaqla bağlı şikayətinin təmin edilməməsini istəyiblər. Cəzaçəkmə müəssisəsinin nümayəndəsi həmçinin Hacızadənin etdiyi əməldən peşman olmadığını və abadlaşdırma işlərində iştirak etmədiyini də bildirib.
Vəkil İsaxan Aşurov isə səslənən fikirlərin bəhanə olduğunu qeyd edib və hakimi Cəzaların İcrası Məcəlləsinə uyğun olaraq Hacızadəni vaxtından əvvəl azad etməyə çağırıb.
Hakim şikayətin təmin edilməməsi ilə bağlı qərar verib.
Məhkəmənin qərarını mənfi qiymətləndirən İsaxan Aşurov hakimin şikayətə baxılmasına formal yanaşdığını və bu qərardan apellyasiya şikayəti verəcəklərini bildirib.
Xatırladaq ki, Adnan Hacızadə və digər blogger Emin Milli və 08 iyul tarixində axşam saatlarında dostları ilə Bakıda “Lebonese” (Livan) restoranında yemək yeyərkən qonşu masada onların söhbətini dinləyən idmançı görkəmli iki nəfər təxribatçı hücum edərək, Emin Milli və Adnan Hacızadəni döyərək, onlara xəsarət yetirib. Zərərçəkmiş şəxs qismində şikayət etmələrinə və xəsarət almalarına baxmayaraq, Səbail RPİ onlara xəsarət yetirənləri sərbəst buraxmış və döyülən gənclərin 48 saat müddətinə şübhəli şəxs qismində saxlanmasına qərar vermiş, iyulun 10-da isə Səbail rayon məhkəməsi “xuliqanlıq” maddəsi ilə təqsirləndirilən gənclər barəsində 2 aylıq həbs-qətimkan tədbirinin seçilməsi ilə bağlı qərar çıxarıb. İyulun 20-də Apellyasiya məhkəməsi sözügedən qərarı qüvvədə saxlayıb. Cinayət işinin istintaqı yekunlaşdırılıb və gənclərə qarşı 221.1.2 (xuliqanlıq) və 127 (qəsdən bədənə az ağır xəsarət yetirmə) maddələri ilə ittiham irəli sürülüb və iş baxılması üçün məhkəməyə göndərilmişdi. Noyabrın 11-də Səbail rayon məhkəməsi Emin Millinin 2 il 6 ay, Adnan Hacızadənin isə 2 il azadlıqdan məhrum edilməsi ilə bağlı qərar çıxarıb. Bakı Apellyasiya Məhkəməsi 10 mart 2010-cu il tarixdə hökmün qüvvədə saxlanılması ilə bağlı qərar qəbul edib. Yerli və beynəlxalq ictimaiyyət bloqçuları vicdan məhbusu kimi tanıyıb.
Foto: http://www.flickr.com/photos/irfs/
