Dekabrın 10-da Yasamal Rayon Məhkəməsində deputatlığa keçmiş namizəd Fuad Qəhrəmanova (Qəhrəmanlı) qarşı ayrı-ayrı şəxslər tərəfindən xüsusi ittiham qaydasında 3 şikayətə baxıldı.
Müşavirədən qayıdan hakim məhkəmənin şikayəti icraata götürməkdən imtina etməsi barədə qərar elan etdi.
Digər prosesdə isə hakim Xəqani Tağıyevin sədrliyi ilə deputat Hüseynbala Mirələmovun Fuad Qəhrəmanova qarşı xüsusi ittiham qaydasında şikayətinə baxılıb. Bu prosesdə də hakim eyni məzmunla Baş Prokurorluğun cinayət məsuliyyətinə cəlb edilməsi üçün razılıq vermədiyini bildirdi. Hakim bildirdi ki, Baş Prokurorluq bunu deputatlığa namizədlərin namizəd olduğu dövrdə öz fikirlərini sərbəst ifadə etmək hüququnun olması ilə əsaslandırıb.
Müşavirədən qayıdan hakim xüsusi ittiham qaydasında verilmiş şikayəti icraata götürülməsindən imtina edilməsi barədə qərarı oxudu.
Üçüncü proses hakim Tahir İsmayılovun sədrliyi ilə Yeni Azərbaycan Partiyasının keçmiş deputatı Əhəd Abıyevin Fuad Qəhrəmanova qarşı xüsusi ittiham qaydasında şikayətə əsasən keçirilib. Hakim Baş Prokurorluğun Fuad Qəhrəmanovun cinayət məsuliyyətinə cəlb edilməsinə razılıq vermədiyini bildirdi.
Müşavirədən qayıdan hakim şikayətin məhkəmə icraatına götürülməsindən imtina edilməsi barədə qərarı elan etdi.
Bütün iddiaçılar Fuad Qəhrəmanovun Cinayət Məcəlləsinin 148-ci (təhqir) maddəsi ilə məhkum olunmasını istəyirdilər.
Qeyd edək ki, proseslərdə xüsusi ittihamçılar iştirak etməyiblər.