Bu gün (16 may) Səbail Rayon Məhkəməsində hakim Famil Nəsibovun sədrliyi ilə “Müxalifət” qəzetinin əməkdaşı Yaşar Ağazadənin Azərbaycan Respublikası Dövlət Neft Şirkətinə (ARDNŞ) qarşı vəzifəli şəxslərin hərəkətlərinin qanunsuz hesab olunması barədə qaldırdığı iddia əsasında məhkəmə hazırlıq iclası keçirilib.
Hazırlıq iclasında Ağazadə vəsatətlə çıxış etdi. Vəsatət ARDNŞ prezidentinin ARDNŞ sisteminə yeni işçilərin işə qəbulunu qadağan edən 21 noyabr 2006-cı il tarixli, 191 saylı əmrinin təsdiq edilmiş surətinin məhkəməyə təqdim edilməsindən ibarət idi.
ARDNŞ-nin nümayəndəsi Şahin İsmayılov bu vəsatətin qəbul olunmamasını xahiş etdi.
Hakim isə vəsatətin məhkəmə baxışında bir daha müzakirə ediləcəyini bildirdi. Proses may ayının 27-i saat 12.30-a təyin olundu.
Xatırladaq ki, “Müxalifət” qəzetinin əməkdaşı Ağazadə peşə fəaliyyəti ilə əlaqədar olaraq ARDNŞ-nə işə qəbul qaydaları ilə bağlı 10 aprel 2008-ci ildə məlumat sorğusu göndərib. Jurnalist ARDNŞ-i prezidentinin 21 noyabır 2006-cı il tarixli, 191 əmrinin təsdiq olunmuş surətinin ona təqdim olunmasını xahiş edib və ARDNŞ-də işə qəbul qaydaları və orada neçə nəfərin fəaliyyət göstərməsi ilə bağlı suallar soruşub. ARDNŞ isə həmin informasiya sorğusuna cavab olaraq bildirib ki, sorğuda göstərilmiş suallarla bağlı ARDNŞ informasiya sahibi deyil. Ağazadə isə informasiya sorğusundakı suallara cavab verilmədiyi üçün ARDNŞ-ni 29 aprel 2008-ci il tarixində məhkəməyə verib