“Azadlıq” qəzetinin həbsdə olan əməkdaşı satirik-jurnalist Mirzə Sakitin (Sakit Zahidov) səhhətində ciddi problemlər yoxdur.
Əgər hər hansı bir problem olsaydısa bu barədə bizə məlumat verilərdi”. Bunu RATİ-yə Ədliyyə Nazirliyi Penitensiar Xidmətinin ictimaiyyətlə əlaqələr şöbəsindən bildiriblər.
APA-nın məlumatına görə, Ədliyyə Nazirliyi Penitensiar Xidmətinin ictimaiyyətlə əlaqələr şöbəsinin rəisi Mehman Sadıqov da dünən jurnalistlərlə söhbətində bildirib ki, Sakitin səhhətində ciddi problemlər yoxdur: “Əgər hər hansı bir ciddi problem olsaydısa, o, Müalicə Müəssisəsinə köçürülərdi”, – deyə bildirən Sadiqov jurnalistin mülki həkim tərəfindən müayinə olunmasını da mümkün hesab edib. O, bildirilib ki, Cəzaların İcrası Məcəlləsinə əsasən, məhkumun yaxınları pullu xidmət müqabilində müayinəni təşkil edə bilərlər.
Qeyd edək ki, dünən (15 may) Mirzə Sakitlə 14 saylı Cəzaçəkmə Müəssisəsində görüşən həyat yoldaşı Rəna Zahidova RATİ-yə satirik-jurnalistin vəziyyətinin pisləşməsi barədə məlumat vermişdi. “Sakitin vəziyyəti çox pisdir. Ürəyində ağrılar var. Özünü pis hiss edir. Gecələr boğulmaları olur. Bütün bunlara baxmayaraq Sakiti yenə də müalicə müəssisəsinə köçürmürlər. O hal-hazırda məhbusların cəza çəkdiyi ümumi hissədə saxlanılır”, – deyə Zahidova bildirmişdi. Jurnalistin müalicə almaq istədiyini deyən Zahidova Sakit üçün xeyli dərman preparatlarını apardığını da qeyd etmişdi.