“Yeni Müsavat” qəzetinin köşə yazarı Mahal İsmayıloğlu ilə bağlı istintaq hərəkətləri yekunlaşaraq Abşeron Rayon Məhkəməsinə göndərilib. Bu xəbəri Reportyorların Azadlıq və Təhlükəsizlik İnstitutuna (RATİ) jurnalistin özü verib.
Onun sözlərinə görə ötən gün (22 fevral) Abşeron Rayon Polis İdarəsinə (RPİ) gedərək istintaq materialları və ekspertiza rəyi ilə tanış olaraq protokola imza atıb və iş məhkəməyə göndərilib.
Xatırladaq ki, M. İsmayıloğlu bağ qonşusu olan Daxili İşlər Nazirliyinin əməkdaşı Vahid İmanovun ona qarşı olan şikayəti əsasında iyunun 27-də polisə çağırılmışdı. Şikayətə səbəb guya jurnalistin qonşusunun qulluqçusunu zibili onun qapısına tökdüyünə görə döyməsi olub. Bu səbəbdən M. İsmayıloğluna qarşı Cinayət Məcəlləsinin 221.3-cü maddəsi (silah və ya silah qismində istifadə edilən əşyalar tətbiq edilməklə törədilən xuliqanlıq) ilə cinayət işi açılıb.