“Dünən axşam mənə çağırış vərəqəsi verdilər. Bu gün prokurorluğa getdim. Əvvəlkindən fərqli olaraq, müstəntiq məni təqsirləndirilən şəxs qismində sorğu sual etdi və izahatımı istədilər. Həmçinin prokurorun Naxçıvanı tərk etməmək haqda şifahi tapşırığını rəsmiləşdirərək məndən iltizam alındı”, – deyə H.Mehdiyev qeyd edib.
Jurnalist deyib ki, prokurorluqdan gəldikdən sonra sahə müvəkkili evlərinə gələrək, ona yenidən prokurorluğa çağırıldığını bildirib. O, yenidən prokurorluğa gedib. Prokuror Kamil Şıxəliyev ondan nə səbəbə izahat vermədiyini və vəkildən imtina etdiyini soruşub. H.Mehdiyev prokurora hüquqlarından istifadə etdiyini və məhkəməyə öz vəkili ilə çıxacağını bildirib.
Xatırladaq ki, iyulun 13-də Şərur rayon İcra Hakimiyyətinin başçısı İbrahim Məmmədovun müavini Ələddin Məmmədov bir neçə şəxslə RATİ-nin Naxçıvandakı müxbiri Həkimeldostu Mehdiyevin evinə gələrək ona təzyiq edib və onun kiçik avtoyuma sexinə gələn elektrik xəttini kəsdirib. İyulun 15-də məsələ ilə bağlı yenidən onun üzərinə hücum edilib. Evinə və sexə gedən elektrik xətləri elektrik dirəkləri ilə birlikdə çıxarılaraq müsadirə olunub. Jurnalistin şəxsi mülkiyyətinə aid olan yardımçı tikililərini, qarajını sökülməyə, yuyucu aparatın isə müsadirə etməyə cəhd ediblər. Məsələni araşdırmaq üçün jurnalistlər Elman Abbasov və İlqar Nəsibov da hadisə yerinə gediblər. Polislər onlara çəkiliş aparmamaları üçün fiziki güc tətbiq ediblər. Jurnalistlər faktla bağlı Naxçıvan Muxtar Respublikası Prokurorluğuna şikayət veriblər. Həmçinin hadisədən sonra H. Mehdiyevə qarşı heç bir sübut dəlil olmadan Şərur rayon Prokurorluğunda 189-1 maddəsi ilə (Təbii qazın, elektrik və ya istilik enerjisinin talanması) cinayət işi açılıb.