2011-ci ildə qətlə yetirilmiş yazıçı-publisist Rafiq Tağının qətli ilə bağlı başlanmış cinayət işi üzrə icraat dayandırılıb. Bu barədə bu gün (08 yanvar) Reportyorların Azadlıq və Təhlükəsizlik İnstitutuna mərhum jurnalistin vəkili Elçin Sadıqov məlumat verib.
Vəkil bildirib ki, Baş Prokurorluğunun Ağır Cinayətlərə Dair İşlər Üzrə İdarəsinin xüsusilə mühüm işlər üzrə böyük müstəntiqi tərəfindən vəkilə məktub göndərilib və orada cinayət işinin icraatının dayandırıldığı qeyd olunub.
“Hesab edirəm ki, cinayət işinin icraatı Cinayət Prosessual Məcəlləsində qeyd edilmiş cinayəti törədənin müəyyən edilməməsi əsası ilə dayandırılıb. Həmin qərarla hələ ki, tanış olmamışam. Qeyd edim ki, Rafiq Tağının cinayət işi üzrə ibtidai istintaq araşdırma aparmayıb. Biz hətta istintaqın səmərəli aparılmaması ilə bağlı məhkəməyə müraciət etmişik, ancaq iddia təmin edilməyib. Qərarın surətini aldıqdan sonra yenidən məhkəməyə müraciət edəcəyik ”, -deyə vəkil əlavə edib.
Xatırladaq ki, Rafiq Tağı 2011-ci ilin noyabrın 19-da işdən evinə qayıdarkən naməlum şəxs tərəfindən 7 bıçaq zərbəsi alıb və 4 gün xəstəxanada müalicə aldıqdan sonra vəfat edib.