REDAKTOR İNFORMASİYA SORĞUSUNU CAVABLANDIRMAYAN NAZİRİ MƏHKƏMƏYƏ VERİB

dekabr 23rd, 2008
Bu gün (23 dekabr) Nərimanov rayon Məhkəməsində hakim Turqay Hüseynovun sədrliyi ilə “Nota” qəzetinin baş redaktoru Sərdar Əlibəylinin (Əliyev) Gənclər və idman naziri Azad Rəhimova qarşı “vəzifəli şəxsin hərəkətsizliyinin qanunsuz hesab edilməsi”  iddiası üzrə  məhkəməyə  hazırlıq  prosesi  keçirilib.

Prosesdə  iddiaçı S. Əlibəyli, cavabdeh tərəfdən isə Gənclər və İdman Nazirliyinin baş hüquqşünası Rauf Əliyev iştirak edirdi.
Proses zamanı bəlli olub ki, S. Əlibəylinin  “Nota” qəzetinin baş redaktoru olmasını təsdiq edən sənəd şikayət ərizəsinə əlavə olunmayıb. Bu səbəbdən   məhkəmə prosesi 25 dekabr saat 11:00-a qədər təxirə salınıb.
Qeyd edək ki, S. Əlibəyli A. Rəhimova 08 oktyabr 2008-ci il tarixində informasiya sorğusu göndərərək “Nota” qəzetinin 05-11 oktyabr tarixli sayında dərc olunmuş “İki nazirin bir şadlıq evi” başlıqlı yazıya münasibət bildirməsini, habelə  bir sıra sualları cavablandırmasını xahiş edib. Nazir  isə sorğuya cavab verməyib. Buna görə də S. Əlibəyli Nərimanov rayon Məhkəməsinə müraciət edərək A. Rəhimovun hərəkətsizliyinin qanunsuz hesab edilməsi, informasiya sorğusunun cavablandırılmasını və  100 min AZN məbləğində  cərimələnməsini tələb edib.