Bu gün (22 dekabr) Yasamal rayon Məhkəməsində hakim Sərdar Mehrəliyevin sədrliyi ilə Azərbaycan Beynəlxalq Universitetinin rektoru Elşad Abdullayevin “Gündəlik Bakı” qəzetinə, qəzetin təsisçisi və baş redaktoru Habil Vəliyevə, baş redaktorun birinci müavini Üzeyir Cəfərova qarşı Cinayət Məcəlləsinin 147 və 148-ci maddələri ilə xüsusi ittiham qaydasında qaldırdığı iddia üzrə məhkəməyə hazırlıq iclası keçirilib. Bu barədə RATİ-yə Ü.Cəfərov məlumat verdi.
Onun sözlərinə görə, prosesdə xüsusi ittihamçı Elşad Abdullayevin vəkili Gülhüseyn Adilov iştirak edib. “Biz artıq bu iddia üzrə məhkəməyə müraciət edildiyini və dekabrın 15-də hakim Svetlana Əhmədovanın sədrliyi ilə bu işə baxıldığını və iddianın rədd edildiyini məhkəməyə bildirdik. Habelə biz məhkəməni aldatmaq istədiyi üçün və bizə qarşı əsasız iddialarını davam etdirdiyinə görə Elşad Abdullayev haqqında cinayət işinin başlanması barədə qərardadın çıxarılması tələbi ilə məhkəmə qarşısında vəsatət qaldırdıq”, – deyə qeyd edən Ü. Cəfərovun sözlərinə görə, sonda hakim onlara qarşı qaldırılmış ittihamı rədd edib.
Xatırladaq ki, iddiaya “Gündəlik Bakı ” qəzetinin 2008-ci il tarixli 194-cü sayında “Elşad Abdullayevin özü haradadır?” və 2008-ci il, 28 noyabr tarixli 218-ci sayında “Elşad Abdullayev öz bacısı oğlunu tutdurub?” başlıqlı məqalələr səbəb olub.
Qeyd edək ki, bu dəfə də ABU-nun rektoru Elşad Abdullayev Habil Vəliyevi və Üzeyir Cəfərovu Cinayət Məcəlləsinin 147, 148-ci maddələri ilə təqsirli bilinərək azadlıqdan məhrum edilməsini, özünə dəymiş mənəvi ziyana görə təqsirləndirilən şəxslərin hər birindən müvafiq olaraq 30 min AZN həcmində cərimələnməsini və bu vəsaitin öz hesabına keçirilməsini tələb edirdi.