Sən demə seçkiləri Anar Məmmədli saxtalaşdırıb

anar

Seçkilərin Monitorinqi və Demokratiyanın Tədrisi Mərkəzinin (SMDT) rəhbəri Anar Məmmədlinin həbsi siyasi xarakter daşıyır. Oktyabrın 9-da prezident seçkilərinin monitorinqi zamanı çoxsaylı qanun pozuntuları qeydə aldığı və SMDT-nin hesabatından nüfuzlu beynəlxalq təşkilatlar tərəfindən istifadə edildiyi üçün hakimiyyət onunla hesablaşır.

Bu, həmçinin bütünlükdə vətəndaş cəmiyyətinin qorxudulması aksiyasıdır ki, heç kim hakimiyyəti tənqid etməyə cürət etməsin. Dekabrın 17-də RATİ-nin ofisində vətəndaş cəmiyyəti fəallarının və siyasətçilərin Anar Məmmədlinin həbsi ilə bağlı ümumi qiymətləndirmələri belə olub.

Vergi ödənişindən yayınma, qanunsuz sahibkarlıq və vəzifə səlahiyyətlərini aşma ittihamları qondarmadır, deyə “Hüquq və İnkişaf” QHT-nin rəhbəri Hafiz Həsənov bildirib. Məmmədli qrant vəsaitlərindən öz vergi ödəyicisinin identifikasiya kodu vasitəsilə istifadə etməkdə ittiham olunur. Lakin SMDT-nin dövlət qeydiyyatı yoxdur və Anar Məmmədli fərdi vergi ödəyicisi kimi hərəkət etmək məcburiyyətində olub. Bunu qanunsuz sahibkarlıq kimi tövsif etmək mənasızdır”, deyə Həsənov o əlavə edib. Vergi ödənişindən yayınma ittihamı da əsassızdır. Çünki mart-aprel aylarında vergi orqanları  Anar Məmmədlinin fəaliyyətini yoxlayıb və heç bir pozuntu aşkarlanmayıb. “Məmmədli seçkilərin monitorinqinə görə təqib olunur. Hakimiyyət istəmir ki, kimsə onlardan asılı olmadan seçkilərlə məşğul olsun”, deyə Hafiz Həsənov qeyd edib.

Araşdırmaçı jurnalist Xədicə İsmayıl belə bir fikir bildirib ki, Anar Məmmədlinin həbsinin katalizatoru SMDT-nin ötən həftə Varşavada ATƏT DTİHB-nin tədbirində Avropa Monitorinq Təşkilatları Əlaqələndirmə Şurasının üzvü seçilməsi olub.

AXCP lideri Əli Kərimli qeyd edib ki, Anar Məmmədlinin hansı bəhanə ilə həbs edilməsinin əhəmiyyəti yoxdur – hakimiyyətin onu ədalətli vətəndaş mövqeyinə görə təqib etdiyi birmənalıdır. “Anar Məmmədli ziyalı insan, seçkilər sahəsində tanınmış ekspertdir. Lakin Azərbaycan hakimiyyəti hətta dinc yolla belə dəyişiklik istəməyə cürət edən hər kəsi həbsə atmağa hazırdır. Bu, həmçinin dünya ictimaiyyətinə avtoritar rejimin Avropaya öz qaydaları ilə getmək niyyətində olması haqqında mesajdır”, deyə Kərimli bildirib. Qərbin Azərbaycan rejimini sakitləşdirməsi mövqeyi belə vəziyyətə gətirib çıxarıb.“Bu rejimin tədricən islah edilə biləcəyi haqqında fikir yanlışdır. Məhz bu siyasət Azərbaycanda bu gün 143 siyasi məhbusun olmasına, repressiyaların isə dövlət siyasəti səviyyəsinə çıxarılmasına gətirib çıxarb”, deyə Əli Kərimli qeyd edib. AXCP sədri daim fəaliyyət göstərən əlaqələndirmə qrupu yaratmağı və onun vətəndaşların könüllü ianələri hesabına fəaliyyətini təmin etməyi təklif edib.

Hüquqşünas Aslan İsmayılov Anar Məmmədlinin azad edilməsi tələbi ilə etiraz aksiyalarına başlamağı təklif edib. Onun fikrincə, Qərbin dəstəyinə bel bağlamağa dəyməz. “Onlara bizim neftimiz, bizim kürümüz, bizim sərvətlərimiz lazımdır”, deyə İsmayılov bildirib.

İqtisadi Araşdırmalar Mərkəzinin rəhbəri Qubad İbadoğlu təbii inhisarların dövlət büdcəsinə 2,4 mlrd. dollar borclanmasına görə heç kimin məsuliyyətə cəlb edilmədiyi halda Məmmədlinin iqtisadi cinayətlərdə ittiham olunmasının cəfəng olduğunu bildirib.

Milli Şuranın rəhbəri Cəmil Həsənli hesab edir ki, oktyabrın 9-da Azərbaycanda hakimiyyət növbəti dəfə qəsb edilib və indi hökumət cəmiyyəti bu saxtakarlıqların yekunları ilə barışmağa məcbur etməyə, onlara mane olanlarla hesablaşmağa can atır.

Media Hüququ İnstitutunun direktoru Rəşid Hacılı toplantıya Nərimanov rayon polis idarəsinin təcridxanasında saxlanılan Anar Məmmədli ilə görüşdən gəldiyini deyib. O,  SMDT rəhbərinə  qarşı irəli sürülmüş bütün ittihamların əsassız olduğunu, lakin Məmmədlinin 308.2-ci maddə üzrə səlahiyyətlərindən sui-istifadə etməklə seçkilərin nəticələrini saxtalaşdırmaqda ittiham olunmasının daha cəfəng olduğunu bəyan edib. Bu məlumat zaldakıların gülüşünə səbəb olub.

RATİ-nin sədri Emin Hüseynov Anar Məmmədlinin həbsini hakimiyyətin 11 dekabr hüquq müdafiə forumunda səslənmiş dialoqa çağırışa mənfi reaksiyası kimi qiymətləndirib. O, 30 fəaldan ibarət qrup yaratmağı və Strasburqa AŞPA-nın qış sessiyasına göndərməyi təklif edib. Bütün siyasi məhbuslar azad edilməsə, Azərbaycanın AŞPA-da səs hüququnun dayandırılması və 2014-cü ilin mayında AŞ Nazirlər Komitəsində sədrliyə buraxılmaması məsələsini qaldırmaq gərək olduğunu bildirib.

Toplantının yekunlarına görə Anar Məmmədlinin hüquqlarının müdafiəsi üzrə İctimai Komitə yaradılması qərara alınıb.

Tədbirdə ATƏT-in, Aİ-nin, ABŞ, Fransa, Almaniya, Niderland və digər ölkələrin səfirliklərinin nümayəndələri də iştirak ediblər.

Previous Post

Jurnalist həbsdə 3-cü doğum gününü qeyd edir

Next Post

Ailəsi Pərviz Həşimliyə təzyiqlərin davam etdiyini bildirir

Leave a Reply

Your email address will not be published. Required fields are marked *

Start typing to see posts you are looking for.