Dünən (16 may) Sabirabad rayonunda – təbii fəlakət bölgəsindən Böyük Britaniyanın Hərb və Sülh İcmalları İnstitutu (www.iwpr.net) üçün reportaj hazırlayarkən “Ayna”-“Zerkalo” qəzetlərinin və Reportyorların Azadlıq və Təhlükəsizlik İnstitutunun əməkdaşı İdrak Abbasov Fövqəladə Hallar Nazirliyinin əməkdaşlarının təzyiqinə məruz qalıb.
Bu barədə RATİ-nin Qaynar Xəttinə hadisə yerindən İ.Abbasovun özü məlumat verib. Jurnalistin verdiyi məlumata görə, ona Sabirabad şəhər stadionunda, şəhərin 2 saylı məktəbində yerləşdirilmiş evləri su basmış əhali ilə söhbət etməyə, onların sosial durumları ilə tanış olmağa imkan verilməyib. Fövqəladə Hallar Nazirliyinin əsgərləri jurnalisti zorla ərazidən kənarlaşdırıblar.
Daha sonra su altında qalmış Şıxlar kəndinin girişində jurnalist yerli əhali ilə FHN əməkdaşlarının mübahisəsini foto lentə alarkən, adı çəkilən qurumun kapitan rütbəli xilasedici əməkdaşı jurnalistdən fotoaparatı almaq istəyib və jurnalisti təxribat törətməkdə ittiham edərək, ona şəkil çəkməyi yox, bel götürərək Kürün qarşısının alınmasına kömək etməyi əmr edib. Baş verənlərə ərazidə xidmət edən polis əməkdaşları müdaxilə edəndən sonra jurnalist sərbəst buraxılıb.
Qeyd edək ki, İ.Abbasov fəlakət bölgəsində üzərində “press” yazılmış xüsusi fərqləndirici gödəkcədə olub.
Məsələ ilə əlaqədar FHN-in mətbuat xidmətinin münasibətini öyrənməyə çalışsaq da, telefon zənglərimiz cavabsız qaldı.