Dünən (6 may) Norveçli jurnalist Erlinq Borgen və onun operatoru Daq İnge Dahl səhər saat 5-də Heydər Əliyev adına Beynəlxalq Hava Limanında təhlükəsizlik heyəti tərəfindən saxlanılıb.
Bu barədə Reportyorların Azadlıq və Təhlükəsizlik İnstitutuna (RATİ) Erlinq Borgenin özü məlumat verib. O bildirib ki, kobud davranan təhlükəsizlik heyəti ondan zorla kamerasını almaq və qəsdən qırmaq istəyiblər. Həmçinin heç bir əsas olmadan jurnalistin əl çantasını özü ilə təyyarəyə keçirməyə icazə verməyərək, onu jurnalistin razılığı olmadan yük yerinə (baqaj) qoyublar. Jurnalist Osloda yük yerindən çantasını götürdükdə, 6 gün Azərbaycanda apardığı çəkilişlər olan disklərin və digər informasiya daşıyıcılarının çantadan yoxa çıxdığını görüb. Jurnalist qeyd edib ki, Eynulla Fətullayev haqqında Strasburq məhkəməsinin qərarının mətni də çantasından yoxa çıxıb. O vurğulayıb ki, apardığı çəkilişin surətləri Oslo şəhərində var və Eynulla Fətullayev haqqında olan “Azərbaycanda məhbus“ adlı sənədli filmin montajı tezliklə başlayacaq .
Məsələ ilə əlaqədar AZAL Dövlət Konserninin mövqeyini öyrənmək mümkün olmadı.
Qeyd edək ki, “Monitor” jurnalının qətlə yetirilmiş baş redaktoru Elmar Hüseynova və Azərbaycanda söz azadlığına həsr edilmiş “Statoylun kölgəsində” filminin müəllifi olan Borgen hazırda “Gündəlik Azərbaycan” və “Realnıy Azerbaydjan” qəzetlərinin baş redaktoru Eynulla Fətullayevə həsr edilmiş film üzərində çalışır.